ch. 7
Att.7.1
Incidit Caesarianum civile bellum. cum haberet
annos circiter sexaginta, usus est aetatis vacatione
neque se quoquam movit ex urbe. quae amicis suis
opus fuerant ad Pompeium proficiscentibus, omnia ex
sua re familiari dedit, ipsum Pompeium coniunctum non offendit.
Att.7.2
nullum ab eo habebat ornamentum, ut
ceteri, qui per eum aut honores aut divitias ceperant:
quorum partim invitissimi castra sunt secuti, partim
summa cum eius offensione domi remanserunt.
Att.7.3
Caesari autem Attici quies tanto opere fuit grata, ut victor,
cum privatis pecunias per epistulas imperaret, huic
non solum molestus non fuerit, sed etiam sororis
filium et Q. Ciceronem ex Pompei castris concesserit.
sic vetere instituto vitae effugit nova pericula.
